Tələbələr “SOCAR Polymer” şirkətinin Sumqayıt şəhərində yerləşən Polipropilen və Yüksəksıxlıqlı Polietilen zavodlarında 8 həftəlik təcrübə proqramına qatıla biləcək. Sumqayıt24 bu haqda bu gün, 6 aprel tarixində şirkətin rəsmi saytına istinadən xəbər verir.
Məlumata görə, sözügedən şirkət yay təcrübə proqramına ərizə qəbulunu açıq elan edib. Tələbələr istehsalat sahəsində və ya ofisdə təcrübə keçmək şansı qazanacaq. Burada onlar müasir neft-kimya sənayesində tələb olunan ən yeni bilik və bacarıqlara yiyələnəcək.
Təcrübəçilər real tapşırıqlar üzərində işləyən kollektivə qoşulacaq, onlar üçün müxtəlif təlimlər və mütəxəssislə görüş təşkil olunacaq.
Bu proqram insan resursları, materialların idarəolunması, texnologiya, laboratoriya, hüquq, İnformasiya Texnologiyaları, maliyyə, sənədlərin idarəolunması, SƏTƏM, texniki dəstəyin planlanması, mühəndislik, texniki dəstək, təchizat sahələri üzrə bilik, bacarıq və təcrübələrini artırmaq istəyən tələbələr üçün nəzərdə tutulub.
Təcrübə proqramına qatılmaq üçün cari ayın sonunadək linkdə yerləşdirilmiş ərizə forması doldurulmalıdır. Namizədlər öz bilik və bacarıqlarına, eləcə də seçəcəkləri karyera istiqamətlərinə ən uyğun olan bir və ya iki təcrübə sahəsi üzrə proqrama qatılmaq üçün ərizə verə bilərlər.
İngilis dilində yaxşı oxuma-yazma bacarıqlarına malik olan, bakalavr pilləsinin son kursunda və ya magistraturada təhsil alan tələbələr müsabiqədə iştirak etməyə dəvət olunurlar.
