Sumqayıt teatrında 45 il çalışan Xalq artisti Valeh Kərimov işsiz qalıb. Bu haqda bu gün, 13 aprel tarixində Qafqazinfo-ya istinadən xəbər veririk.
“Söhbət küskünlükdən getmir. Bekar insanam. Mənim də bekarçılıqdan zəhləm gedir. Mən bu sənətə gəlmişəm ki, ömürlük işləyim. Axı niyə kənarda qalım ki? Canım sağ, danışığım yerində, gözlərim görür, qulağım da eşidir... Mən yaratmaq istəyirəm. Maaş vermə, Prezident təqaüdü alıram, amma çalışım. Axı səhnədən ötrü vaxtilə atam da danışdırmayıb məni. Səhnəyə hər şeyimizi qurban vermişik, səhnədən ötrü gec ailə qurdum. Müəllimim dedi ki, ailəlisən? Dedim ki, subay. Dedi ki, özünü sənətdə tapsan, evlənərsən. Gördüm, tapmadım, getdim evləndim. İkisindən birini seçdim. Evdə öz-özümə nə qədər monoloq qurum? Məcburam ki, oturum ölümümü gözləyim”, - deyə Xalq artisti bildirib.
Valeh Kərimovun ən tanınmış rolu “Bəxt üzüyü”ndəki Moşu obrazıdır. Aktyorun sözlərinə görə, məhz bu rol onun gələcək karyerasında böyük iz qoyub. İllərdir ki, onu filmlərə və tamaşalara dəvət etmirlər.
