Sumqayıt Dövlət Dram Teatrında Beynəlxalq kitab bağışlama günü ilə bağlı maraqlı layihə gerçəkləşib.
Sumqayit24.az xəbər verir ki, teatrın yeni yaranacaq kitabxanası üçün bir kitab gətirən "Ocaq" tamaşasına dəvətnamə əldə edib.
Öncə foyedə düzənlənən tədbirdə moderator, Əməkdar artist Cəlal Məmmədov Beynəlxalq kitab bağışlama gününün tarixindən söz açıb, layihənin əhəmiyyətindən danışıb. Natiqlər tədbirin ədəbi-mədəni, mənəvi əhəmiyyətini vurğulayıb, müasir gəncliyin uğur hekayəsinin tamamlanması, onların doğru yolda sabit-qədəm üçün kitabın mayak rolundan bəhs ediblər. Dəvətlilər şəxsi kitabxanalarından kitabları teatra hədiyyə ediblər. Daha sonra qonaqlar "Ocaq" tamaşasını izləmək üçün zala daxil olublar.
Qeyd edək ki, Türkiyənin ünlü yazarı Turqut Özakmanın "Ocaq" psixoloji dramına teatrın baş rejissoru, Xalq artisti Firudin Məhərrəmov quruluş verib.
