Sumqayıt və Aktaunu birləşdirən Trans-Xəzər Kabel Xətti layihəsi çərçivəsində Xəzər dənizinin dibinin tədqiqi başa çatır.
Sumqayit24.az xəbər verir ki, bu barədə “Kazakhtelecom” şirkətinin İdarə Heyətinin sədri Bağdat Musin məlumat verib.
Onun sözlərinə görə, tədqiqatın əsas hissəsi ixtisaslaşdırılmış qurğularla təchiz edilmiş gəmilərdə aparılır.
“Gəmilər üçün əlçatmaz yerlərdə dərinlikləri öyrənmək üçün ROV robotu ilə birlikdə çalışan dalğıclar cəlb olunur”, - deyə B.Musin əlavə edib.
O, hazırda torpaq analizlərinin aparıldığını, kabelin çəkilməsi qarşısında mümkün maneələrin müəyyən edildiyini bildirib. “Sahil zonası artıq öyrənilib, lakin işlər hələ davam edir”, - B.Musin deyib.
Qeyd edək ki, Trans-Xəzər Kabel Xətti layihəsi Xəzər dənizinin dibi ilə Sumqayıt (Azərbaycan) və Aktau (Qazaxıstan) şəhərlərini birləşdirən 380 km uzunluğunda fiber-optik kabel xəttinin çəkilməsini nəzərdə tutur. Bu, yüksək ötürmə qabiliyyətinə malik məlumatların çatdırılmasını və 400 terabit/s-ə qədər yüksəksürətli internet bağlantısını təmin edəcək.
Qeyd edək ki, “Kazakhtelecom” Qazaxıstanın milli rabitə operatoru statusuna malik olan ən böyük telekommunikasiya şirkətidir.
