Sumqayıt-Yalama dəmir yolunda yenidənqurma işlərinin 46,84%-i tamamlanıb. Sumqayıt24 bu haqda 25 noyabr tarixində Report.az-a istinadən xəbər verir.
“Azərbaycan Dəmir Yolları” QSC-nin Layihə koordinatoru Gəncəli İsgəndərzadə bildirib:
"Belə ki, yolun 180,2 km-lik hissəsində mövcud relslərin söküntüsü, 171,6 km-lik hissəsində mövcud torpaq yatağının, alt-ballast və ballast materialının qazıntısı işləri həyata keçirilib. Həmçinin tikinti dövründə 82 körpü, 172 dairəvi suötürücü boru, 12 ədəd heyvan keçidi və 4 ədəd yerüstü piyada keçidi inşa edilib.
Hazırda tikinti-quraşdırma işləri davam etdirilir. Yolboyu 13 ədəd yerüstü piyada keçidinin və 32 ədəd eyni səviyyəli dəmiryol keçidinin tikintisi planlaşdırılır. Əsas yaşayış mərkəzlərində yerləşən stansiyalarda yerüstü piyada keçidləri fiziki məhdudiyyətli insanlar üçün liftlərlə təchiz olunacaq".
Onun sözlərinə görə, dəmir yolunun bir xətti yenidən qurularkən digərində qatarlar hərəkət edir: "Bu günədək yolun 154,8 km-lik hissəsində yeni rels-şpal şəbəkəsi quraşdırılıb. Görülən işlər çərçivəsində dəmir yolunun 142,9 km-i ilkin hərəkətə açılıb".
G. İsgəndərzadənin fikrincə, Sumqayıt-Yalama dəmir yolu xəttinin yenidən qurulması yükdaşıma və sərnişindaşıma fəaliyyətinə böyük fayda gətirəcək.
