Yenilənib saat: 16:45
DİN Mətbuat Xidmətinin əməkdaşı, polis leytenantı Nurlan Əliyev məsələyə aydınlıq gətirib. Bu barədə Report.az-a istinadən xəbər veririk.
O bildirib ki, protokol tərtib olunmamışdan öncə, 75 yaşlı Solmaz Hacıyeva ilə çoxmənzilli binanın qarşısında keçirilən dezinfeksiya işlərinə maneə törədib. Bu səbəbdən onunla öncə də profilaktiki söhbətlər aparılmışdır.
Saat 10:20
Sumqayıtda pişikləri yemləyən yaşlı qadın cərimələnib. Sumqayıt24 bu haqda 14 iyul tarixində Qafqazinfo.az-a istinadən xəbər verir.
Qonşular, S. Hacıyevanın yaşadığı məhəllədə 100-ə yaxın pişik saxladığını, buna görə də antisanitariyanın yarandığını bildiriblər. Bununla bağlı öz ünvanına təhqirlər eşidən 75 yaşlı qadın polis bölməsinə şikayət edib, lakin onun şikayəti icraata götürülməyib.
Əksinə Hacıyeva barəsində İnzibati Xətalar Məcəlləsinin “epidemiya əleyhinə rejimin, sanitariya-gigiyena və karantin rejimlərinin pozulmasına görə” maddəsi ilə protokol tərtib olunub.
Qeyd edək ki, müddəanın tələblərinə əsasən fiziki şəxslər 200 manatdan 400 manatadək cərimə olunur.
