Sumqayıtda həkim-revmatoloqa cinayət işi açılıb. Sumqayıt24 bu haqda 17 yanvar tarixində Lent.az-a istinadən xəbər verir.
2 saylı xəstəxananın terapiya şöbəsinin əməkdaşı, 70 yaşlı Firuzə İmanova Cinayət Məcəlləsinin 308.1-ci (Vəzifə səlahiyyətlərindən sui-istifadə) və 313-cü (Vəzifə saxtakarlığı) maddəsi ilə təqsirli bilinir.
İttihama əsasən, F. İmanova 2021-ci ilin iyul ayının 1-dən avqustun 13-dək həmin şöbənin müdiri Şəkərəli Həsənov məzuniyyətdə olarkən onu əvəz edib. Bu zaman isə 3 nəfərin xəstəlik dərəcəsini sənədlərə qəsdən ağır qeyd edib ki, onlar əlillik ala bilsinlər.
Məhkəmənin qərarı ilə onun barəsində başqa yerə getməmək haqqında iltizam tədbiri seçilib. Məhkəmə istintaqı davam edir.
