Sumqayıt Sukanal İdarəsində ictimaiyyət nümayəndələri ilə görüş keçirilib. Bu haqda bu gün, 18 iyul tarixində “Azərsu” ASC-yə istinadən xəbər veririk.
“Hazırda Sumqayıt şəhərində abonentlərin 90 faizi 24 saat fasiləsiz su ilə təmin olunur. Qrafik əsasında su ilə təmin edilən 8, 9 və 10-cu mikrorayonların da 24 saatlıq rejimə keçirilməsi istiqamətində işlər davam etdirilir. İyul ayı ərazində isə 8-ci mikrorayondakı 40-dan artıq çoxmənzilli binanın sakinləri də fasiləsiz su alacaqlar”, - Sumqayıt Sukanal İdarəsinin rəisi Xalid Quluzadə bildirib.
Görüş zamanı Yaşıldərə yaşayış massivində kanalizasiya infrastrukturunun yaxşılaşdırılması, Yaşma bağ massivində, Ceyranbatan qəsəbəsinin yeni yaşayış massivində içməli su infrastrukturunun yaradılması haqda məlumat verilib.
Sonra ictimaiyyət nümayəndələri Sumqayıt tullantı Sutəmizləyici qurğusunda olublar. Onlara qurğuda aparılan emal prosesi, tullantı sularının təmizlənmə texnologiyası ilə bağlı ətraflı məlumat verilib.
