Sumqayıtda 7 yaşlı uşaq xəstəxanada dünyasını dəyişib. Sumqayıt24 bu haqda bu gün, 21 iyun tarixində Qafqazinfo-ya istinadən xəbər verir.
Məlumata əsasən, iyunun 19-u Ömər Amallının səhhətində problem yaranıb. Valideynləri ünvana təcili tibbi yardım çağırıb. Ona tənəffüs çatışmazlığı diaqnozu qoyulub. Saat 19:30 radələrində azyaşlı Sumqayıt Şəhər Uşaq Xəstəxanasına gətirilib. Bu zaman onda göyərmə, boğulma simptomları müşahidə edilib, saturasiyası isə (SPO2) 47% olub.
“Azyaşlı Uşaq Xəstəxanasının Təcili yardım şöbəsinin növbətçi həkimi tərəfindən qəbul edilib, ona kəskin bronxit, bronxospazm ilə T.Ç. III-IV dərəcə diaqnozu qoyulub və vəziyyətinin ağırlığı ilə əlaqədar olaraq İntensiv terapiya bölməsinə yerləşdirilib.
Xəstədə ürək və tənəffüs fəaliyyətinin dayanması müşahidə olunub. Ürək-ağciyər reanimasiya tədbirləri həyata keçirilib, ürək və tənəffüs fəaliyyəti bərpa edilib və reanimatoloq tərəfindən traxeyanın intubasiyası icra olunarkən xəstədə təkrar ürək dayanması baş verib. Həyata keçirilən müvafiq tibbi yardımlara baxmayaraq, saat 20:50 radələrində xəstənin bioloji ölümü baş verib”, - Sumqayıt Tibbi Mərkəzi İctimaiyyətlə əlaqələr bölməsindən bildirilib.
Buna baxmayaraq, valideynlər yeganə övladları olan Ömərin vəfat etmə səbəbini həkim səhlənkarlığında görürlər.
