Sumqayıtda 90 yaşlı qadın baxımsız qalıb. Bu haqda 11 noyabr tarixində Sumqayıt24 xəbər verir.
Ahıl Nigar Hüseynova 13-cü mikrorayonda, 61 saylı binanın 24 nömrəli mənzilində yaşayır. O, heç vaxt ailə həyatı qurmayıb. Uşaq vaxtı ayağının birini itirib və illərdir protezlə gəzir. Qardaşları və bacısı dünyasını dəyişiblər. Uzun müddət onunla yaşayan qardaşı övladları da həmin mənzili tərk ediblər.
“Toy ediblər, ailə qurublar, kirayə ev tutublar, heç mənim xəbər olmayıb. Sonradan eşitmişəm ki, onlar evləniblər”, - deyə qadın olanları şərh edib.
İddiaya görə, hazırda onunla yaşayan qardaşının həyat yoldaşı ona baxmır. Günlərlə ac qalır. Pəncərədən insanlardan ona çörək almaqlarını xahiş edir.
Əmək və Əhalinin Sosial Müdafiəsi Naziriliyinin Sosial Xidmətlər Agentliyindən məsələ ilə bağlı BakuTV-yə açıqlama verilib. Bildirilib ki, qurumun əməkdaşları Nigar Hüseynovanın evinə gediblər. Ailə tərəfindən xanımın ahıllar evinə yerləşdirilməsi ilə bağlı istək var, lakin vətəndaş özü məsələyə tərəddüdlə yanaşır. Onun da fikri qətiləşdikdən sonra lazımi dəstək göstəriləcək.
