Sumqayıt Apellyasiya Məhkəməsində dələduzluq edən Amil Nəbiyevin (ad, soyadı şərtidir) apellyasiya şikayətinə baxılıb.
Pravda.az-ın məlumatına görə, hakim Ruhiyyə Əsgərovanın sədrliyi ilə keçirilən prosesdə qərar elan olunub.
Qərara əsasən, Sumqayıt Şəhər Məhkəməsinin hökmü cəza təyin edilməsi hissəsində dəyişdirilib. Təqsirləndirilən şəxsin Cinayət Məcəlləsinin 178.2.4-cü (dələduzluq) maddəsi ilə təyin edilmiş 1 il 6 ay müddətə azadlığın məhdudlaşdırılması (elektron qolbaq) cəzası 2 il 6 ay müddətinə azadlığın məhdudlaşdırılması cəzası ilə əvəz edilib.
İttihama görə, Amil Nəbiyev özünü nüfuzlu şəxs kimi tanıtdıraraq qaynı və onun qonşusu, zərərçəkmiş Namiq Vəliyevə (ad, soyadı şərtidir) işlədiyi Sumqayıt Sukanal idarəsinə işə düzəldəcəyinə dair yalan vəd verib. O, həmin işin görülməsi müqabilində 26 fevral 2022-ci il tarixdən 07 mart 2022-ci il tarixədək onlardan ümumilikdə 6000 manat pulu dələduzluq yolu ilə ələ keçirib.
