Sumqayıtda aparılan söküntü prosesi ilə bağlı kompensasiya məsələləri diqqət mərkəzindədir. Əhali üçün təklif olunan məbləğlər əraziyə və layihənin xüsusiyyətlərinə görə dəyişir.
Maraqlıdır, indiki bazar qiymətinə görə evləri sökülən vətəndaşa nə qədər kompensasiya verilməlidir?
İqtisadçı Natiq Cəfərli Konkret.az-a bildirib ki, əgər əmlak dövlət ehtiyacı üçün alınmırsa, vətəndaş qiyməti özü müəyyən etməkdə sərbəstdir. Sadəcə olaraq, tərəflər danışıqlar yolu ilə ortaq məxrəcə gəlməlidirlər.
Əmlak məsələləri üzrə ekspert Elnur Azadov isə açıqlamasında qeyd edib ki, Sumqayıtda orta qiymətlər 1500-2000 manat arasında dəyişir:
“Kompensasiyalara gəldikdə isə, burada orta bir rəqəm göstərmək düzgün deyil. Hər bir vətəndaşa verilən kompensasiya fərdi xarakter daşıyır və bu, olduqca vacib məsələdir. Azərbaycanda “Qiymətləndirmə fəaliyyəti haqqında” qanun qüvvədədir və bu ildən etibarən Qiymətləndirmə Palatası da fəaliyyətə başlayıb. Əgər hər hansı ərazidə və ya binada söküntü işləri aparılırsa və vətəndaşlar tikinti şirkəti ilə razılığa gələ bilmirlərsə, hər iki tərəf üçün ən düzgün yol qiymətləndiricilərə müraciət etməkdir. Qiymətləndiricilərin təqdim etdiyi obyektiv və ortaq dəyər əsasında kompensasiya təyin olunmalıdır”.
Ekspert əlavə olaraq qeyd edib ki, bu, fərdi bir məsələdir və hər bir mənzil ayrıca qiymətləndirilməlidir.
“Çünki mənzilin yerləşdiyi yer, mərtəbəsi, ümumi sahəsi və xüsusilə də təmir vəziyyəti qiymətə birbaşa təsir göstərir. Buna görə də, hər söküləcək binada yerləşən mənzillər ayrıca qiymətləndirilməli və bu proses “Qiymətləndirmə fəaliyyəti haqqında” qanuna uyğun şəkildə aparılmalıdır. Bu isə vətəndaşların hüquqlarının qorunması baxımından vacibdir”.
