Qarabağ bölgəsini polad və plastik borular, eləcə də texniki avadanlıqlarla Sumqayıtda fəaliyyət göstərən müəssisə təmin edir. Həmin məhsullar ölkədə ilk ağıllı kəndin tikintisi zamanı da geniş istifadə olunurlar. Bu haqda AzTV-nin reportajına istinadən xəbər veririk.
Kimya Sənaye Parkının rezidenti olan “Azərtexnolayn” MMC-nin 3 zavod və 2 istehsal sahəsi, keçən ildən etibarən qeyd etdiyimiz bölgədə quruculuqla məşğul olan şirkətlərin sifarişlərini icra edir.
Burada satış meneceri vəzifəsində çalışan Tural Aslanovun sözlərinə görə, hazırda inşa olunan Zəngilan ağıllı kənd layihəsində, müəssisədə istehsal olunan quyu qapaqlarından, polietilen borulardan, həmçinin həmin yaşayış massivi üçün nəzərdə tutulan mühafizə tipli metal hasarlardan və s. istifadə olunur.
Bundan əlavə, “Azərtexnolayn”ın məhsullarından Qarabağda yol tikilişində, su xətlərinin çəkilişində və digər quruculuq işlərində istifadə olunur.
Qeyd edək ki, müəssisədə ümumilikdə 52 növ müxtəlif məhsul istehsal olunur. Məhsullardan bir çoxu Türkiyə, İsveç, İsveçrə, Polşa, Avstraliya, Rumıniya, Çexiya, Rusiya, Gürcüstan, Qazaxısatan və Özbəkistana ixrac edilir.
