Sumqayıtda fəhlələr arasında dava olub.
Demokrat.az-ın əldə etdiyi xəbərə görə, hadisə Mədəniyyət və incəsənət parkında baş verib. 1988-ci il təvəllüdlü Murad pul borcu üstündə yaranan mübahisə zamanı tanışı Namiqə sillə və yumruq vurub. Ona müxtəlif dərəcəli bədən xəsarətləri yetirib.
Hadisəni törədən Muradın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Murad ona elan olunan ittiham üzrə özünü təqsirli bilib. O, ifadəsində göstərib ki, hadisə günü saat 22:30-da Mədəniyyət və incəsənət parkının ərazisində yerləşən “Turan” restoranın yaxınlığında gəzdiyi zaman təxminən 1 il əvvəl eyni ünvanda fəhlə kimi çalışdığı Namiqi görüb, onlar söhbət ediblər:
“Söhbət zamanı da birlikdə işlədiyimiz müddətdə ona verdiyim 50 manat borc pulu tələb etdim. Namiq hazırda maddi imkanının zəif olduğunu, vəziyyəti düzələndə mənə olan 50 manat borcunu ödəyəcəyini dedi. Lakin, Namiqi uzun müddətdir ki, görmədiyim üçün pulumu indi istədiyimi bildirdim. Namiq də hazırda imkanı olmadığını bildirərək ünvanıma nalayiq ifadə işlətdi, ümumiyyətlə həmin pulu verməyəcəyini dedi. Bundan sonra da Namiqin dediyi ifadələrdən əsəbləşdiyim üçün sağ əlim ilə onun başının sol nahiyyəsinə bir dəfə sillə ilə, sonra da bir dəfə yumruqla zərbə vurdum. O da yıxıldı. Namiq məndən yaşca böyük olduğundan yaxınlaşaraq üzrxahlıq etmək istədim. Lakin, Namiq ayağa qalxaraq barəmdə polisə müraciət edəcəyini dedi və oradan getdi”.
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə Murad Cinayət Məcəlləsinin 128-ci maddəsi ilə təqsirləndirilməsinə dair cinayət təqibinə həmin məcəllənin 73.2-ci maddəsinə əsasən xitam verilib. O, cinayət məsuliyyətindən azad edilib.
