Sumqayıtda Fövqəladə Hallar Nazirliyinin (FHN) aidiyyəti qurumları tədbir keçirib.
Sumqayit24.az Nazirliyə istinadən xəbər verir ki, tədbir fövqəladə hallarla bağlı davranış qaydaları barədə əhalinin maarifləndirilməsi məqsədilə təşkil edilib.
FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin iştirakı ilə Sumqayıt Regional Mərkəzi tərəfindən Abşeron rayonu Digah, Masazır və Novxanı Ailə Sağlamlıq mərkəzlərində, “Tağıyev”, “Sumqayıt” və “Corat” xilasetmə məntəqələrinin ərazisində yerləşən çimərliklərdə istirahət edən vətəndaşlar arasında maarifləndirmə tədbirləri həyata keçirilib.
Qeyd olunub ki, tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.
Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların başvermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, sularda təhlükəsizliklə bağlı məsələlər diqqətə çatdırılıb və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.
