Sumqayıtda “Əlilliyi olan uşaqlarla iş” layihəsi uğurla davam edir.
Sumqayit24.az xəbər verir ki, proqram “Çıraq” Uşaq İnkişaf Mərkəzi İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə təşkil olunub.
Layihəyə Sumqayıt şəhərində I və II Qarabağ müharibəsi zamanı Vətənin ərazi bütövlüyü uğrunda canlarından keçən şəhidlərin, müharibə əlillərinin və iştirakçılarının ailə üzvlərindən olan və müxtəlif xəstəliklərdən əziyyət çəkən uşaqlar cəlb olunublar.
Əlilliyi olan uşaqlar - öz həmyaşıdları ilə müqayisədə inkişaflarında geriqalma, qavrama (koqnitiv), kommunikativ, sensor və başqa funksiyaların pozulması aşkar olunan şəxslərdir. Bu vəziyyətə baxmayaraq bu uşaqların daim cəmiyyətdə digər uşaqlarla birgə olması vacib amillərdən biridir. Bu məqsədlə uşaqlara layihəyə cəlb olunanan təlimçi tərəfindən müxtəlif mövzuları əhatə edən təlimlər keçirilir. Təlimlər həm fərdi, həm də qrup şəklində aparılır. Qoyulan mövzulara uyğun hər bir uşağa əyani vəsait hazırlanır və təlimlər zamanı tətbiq olunur.
Təlimlər zamanı uşaqların bir çox bacarıqları inkişaf etdirilir. Uşaqlar yaş səviyyəsinə görə qruplara bölünür və hər biri ilə fərdi və qrup şəklində iş aparılır. Uşaqlarla yanaşı valideynlər də təlimlərdə aktiv iştirak edir və yeni bacarıqlar əldə edirlər. Onlar özlərini daha inamlı və qətiyyətli hiss edir və problemlərin həlli yollarını bilirlər.
