Sumqayıt Dövlət Universitetində görkəmli publisist Ömər Faiq Nemanzadənin 150 illik yubileyi münasibətilə “Dili kəsilməyən millətin vücudu kəsilməz” adlı təqdimat keçirilib. Bu haqda 24 dekabr tarixində Sumqayıt24 xəbər verir.
Təqdimat Filologiya fakültəsinin 4-cü kurs tələbəsi Vəfa İsgəndərli tərəfindən hazırlanıb. Həmin fakültənin dekanı, dosent Sevinc Həmzəyeva mütəfəkkirin həyat və yaradıcılığından danışıb. O bildirib ki, Ö.F. Nemanzadə azərbaycançılıq ideyalarının təbliğində xidməti olan alovlu publisist və vətənpərvər ziyalı olub. Bütün müsəlman Şərqində məşhur olan “Molla Nəsrəddin” satirik jurnalının həmtəsisçisi olmaqla milli jurnalistikanın formalaşmasında və inkişafında mühüm xidmətlər göstərib. O, həmçinin bir sıra digər qəzet və jurnallarda: "Açıq söz", "Tərəqqi", "İrşad", "Həyat", "Rəncbər", "Adıgün kolxozçusu", "Kommunist", "Qızıl bayraq", "Bağban" və s. çıxış edərək öz yaradıcılıq missiyasını yerinə yetirib və xalqımızın dəyərlərini öz yaradıcılığında təbliğ edib. Həbsə düşməyinin, repressiya qurbanı olmağının da əsl səbəbi məhz onun dil, maarif, yeni əlifba və türkçülük təəssübkeşi olması idi.
Daha sonra tələbə Vəfa İsgəndərli hazırladığı təqdimatla Axısqa türklərinin tarixi və mədəniyyəti haqqında çıxış edib. O, sovet rejimi tərəfindən tarixi vətənlərindən Orta Asiya və Qazaxıstana sürgün edilən, 12 il xüsusi komendant rejimi şəraitində yaşayan, sürgün yollarının və qürbət güzəranının əzablarından on minlərlə soydaşları tələf olan Axısqa türklərinin 1958-ci ildən başlayaraq Azərbaycana köçürülməsindən məlumat verib.
Elm və innovasiyalar üzrə prorektor, professor Ramazan Məmmədov, Azərbaycan və xarici ölkələr ədəbiyyatı kafedrasının müdiri, professor Avtandil Məmmədov, Kimya və onun tədrisi metodikası kafedrasının professoru Muxtar Səmədov da mövzu barədə danışıblar.
Azərbaycanda yaşayan Axısqa türklərinin “Vətən” İB-nin sədr müavini Yusif Səfərov təqdimatı yüksək qiymətləndirib. Bildirilib ki, Ömər Faiq Nemanzadə, Əhməd Bəy Pepinov, Şəfiqə Əfəndizadə, Adil Əfəndiyev, Fuad Əfəndiyev, Mövlud Bayraqdarov, Məhəmməd Cəlilov, Bəkir Mamoyev kimi bir çox Axısqa əsilli ziyalılar Azərbaycanın ictimai həyatında fəal iştirak ediblər.
Tədbirin sonunda tələbələrin iştirakı ilə “Şərqi-Rus” qəzetində Ömər Faiq Nemanzadənin Cəlil Məmmədquluzadə və Əli bəy Hüseynzadə ilə görüşlərindən ibarət səhnəcik nümayiş olunub.
