Xəbər verdiyimiz kimi, Uşaq Xəstəxanasında gecə növbəsində otorinolaringoloq (LOR) həkiminin olmaması faciəyə səbəb ola bilərdi.
Məsələ ilə bağlı Sumqayıt Tibb Mərkəzinin (STM) İctimaiyyətlə əlaqələr bölməsinin müdiri Ramil Zeynallı Sumqayit24.az-a açıqlama verib.
O bildiririb ki, 25.05.2025-ci il tarixində saat 00:10 radələrində Sumqayıt Tibb Mərkəzinin (STM) Uşaq Xəstəxanasının Təcili yardım şöbəsinə 2020-ci il təvəllüdlü Dünyamalıyev Arslan Babək oğlu, valideynlərinin müşayiəti ilə, burun boşluğunda yad cisim qalması şikayəti ilə gətirilib.
“Həmin gün saat 09:00-dan 21:00-dək otolorinqoloq (qulaq, burun, boğaz həkimi) növbədə olub. Gecə saatlarında isə otolorinqoloq ixtisası üzrə tibbi xidmət çağırış rejimində təşkil olunur. Belə hallarda, təcili tibbi müdaxilə tələb olunduqda otolorinqoloq çağırış əsasında işə cəlb edilirlər. Lakin qeyd edilən hadisə zamanı valideynlər həkimin çağırışla gəlməsini gözləmədən xəstəxananı tərk ediblər.
Qeyd edirik ki, bu yanaşma Azərbaycan Respublikasının Əmək Məcəlləsinin və Səhiyyə Nazirliyinin normativ aktlarının tələblərinə tam uyğundur. Eyni zamanda, Sumqayıt Tibb Mərkəzinin rəhbərliyi mövcud kadr çatışmazlığının aradan qaldırılması istiqamətində zəruri tədbirlər görməkdədir.
STM əhalinin sağlamlığının qorunması və yüksək keyfiyyətli tibbi xidmətin göstərilməsi üçün fəaliyyətini məsuliyyətlə davam etdirir”, - Ramil Zeynallı əlavə edib.
