Sumqayıt Dövlət Dram Teatrında “Gücümüz həmrəyliyimizdədir” adlı ilin yekun hesabat konserti baş tutub. Bu barədə 29 dekabr tarixində Sumqayıt24 xəbər verir.
Dünya Azərbaycanlılarının Həmrəyliyi Günü və Yeni İlə həsr olunan tədbir Regional Mədəniyyət İdarəsi tərəfindən keçirilib. Əvvəlcə şəhidlərin əziz xatirəsi bir dəqiqəlik sükutla yad edilib. Sonra regionun mədəni həyatında fəal iştirakına görə mədəniyyət müəssisələrinin bir qrup əməkdaşı Fəxri fərmanla təltif olunub. Çıxış edən qurum və təşkilatların rəhbər şəxsləri qonaqları bayram münasibətilə təbrik ediblər.
Tədbirin bədii hissəsi “Sumqayıt” ansamblının hazırladığı konsert proqramı ilə davam edib. Yeni yaradılan ansamblın bədii rəhbəri və dirijoru Şərqiyyə Mustafayevadır.
Konsertdə səsləndirilən Ü.Hacıbəyovun “Koroğlu”, C.Cahangirovun “Füzuli kantatası”, Amil Həsənoğlunun “Alagöz”, Sumqayıt Muğam Mərkəzinin direktoru, “Tərəqqi” medalı mükafatçısı Aytən Məhərrəmovanın “Mahur” Təsnifi, Televiziya Muğam müsabiqəsinin qalibi Sədəf Budaqovanın “Qəşəngdir”, Sumqayıt şəhər Bülbül adına 2 nömrəli Uşaq İncəsənət Məktəbinin 4-cü sinif şagirdi Nuray Şahsuvarlının “Kəsmə Şikəstə”, Taleh Rəsulovun A.Zeynallının “Ölkəm”, A.Piazzolla “Libertango” və Məlahət Hüseynovanın “Qarabağ Şikəstəsi” tamaşaçılarda bayram ab - havası yaradıb.
