Sumqayıt Dövlət Rəsm Qalereyasında “Birliyimiz - Həmrəyliyimizdir” adlı sərgi-tədbir keçirilib. Sumqayıt24 bu barədə 28 dekabr tarixində xəbər verir.
Dünya Azərbaycanlılarının Həmrəylik Gününə həsr olunan tədbirdə rəssamlar, müəssisə və təşkilat rəhbərləri, ziyalılar və KİV nümayəndələri iştirak ediblər. Tədbir Dövlət Himninin səsləndirilməsi ilə başlayıb. Sonra şəhidlərin xatirəsi bir dəqiqəlik sükutla yad edilib. Burada, həmçinin iki möhtəşəm əsər: “Azərbaycan xəritəsi” və “Xarı bülbül rəsmləri” nümayiş olunub. Çıxışlarda vətənin bütövlüyü uğrunda canını fəda edənlərin əbədiyyət səhifələrində yer aldıqları bildirilib. Qızıl Aypara Cəmiyyəti Sumqayıt şəhər bölməsinin sədri Mətanət Məhərrəmova şəhidlik məqamının ucalığından danışıb, şəhid və qazi övladlarına hədiyyələr təqdim edib.
Sonda Sumqayıt şəhər Əhməd Bakıxanov adına Uşaq İncəsənət Məktəbinin xor kollektivi və müğənni Xəyal Cəbrayıllı musiqi nömrələri ilə çıxış ediblər.
