Sumqayıtda istehsal edilən ehtiyat hissələrindən pikapların yığılmasında istifadə oluna bilər. Sumqayıt24 bu haqda 13 iyun tarixində Apa.az-a istinadən xəbər verir.
Naxçıvan Avtomobil Zavodunda sentyabr ayından Çinin "ZX Avto" markasına aid pikap və elektromobillərin yığılması planlaşdırılır. Avtomobilin hissələri, əsasən, Çindən gətiriləcək. Zavodun da daxil olduğu "Cahan Holdinq"in satış departamentinin rəhbəri Fərhad Hüseynovun sözlərinə görə, əgər şirkət təsdiq edərsə, pikapların yığılması zamanı Sumqayıt zavodlarında istehsal edilən bir neçə ehtiyat hissəsi də istifadə edilə bilər.
O qeyd edib ki, burada ildə 300-400 nəqliyyat vasitəsinin yığılması planlaşdırılır. Nümunə üçün artıq 7-8 Çin markası Azərbaycana gətirilib: "Elektromobil markası seçildikdən sonra ilkin olaraq 40-50 ədəd 7-8 nəfər sərnişin tutumlu miniven, sedan və xeçbek tipli elektromobilin yığılması planlaşdırılır".
