Sumqayıtda naməlum şəxslər küçə itlərini öldürüblər. Sumqayıt24-ə bu barədə izləyicilər məlumat veriblər.
Tükürpədici hadisə ilə birləşmiş məhəllənin (7-8-12) sakinləri rastlaşıblar. Onların sözlərinə görə, axşam saatlarında kimsə küçədə olan itlərə və onların balalarına zəhər verib. Daha sonra ölmüş itləri zibil qutusuna atıb.
Redaksiyamıza daxil olan şikayətlərin bir qismini təqdim edirik:
“Əvvəllər mənim pəncərəmin altında da hər səhər şpris və pivə butulkaları dolu olurdu. Lakin sonradan burada itlər yatmağa başladı və narkomanlar qorxub gəlmirdilər”, - deyə məhəllə sakini bildirib.
“Bir-iki it yatırdı orada, ağıllı da heyvanlar idi. Camaat yatanda narkomanlar gələ bilmirdi ora. Hürdükləri üçün, gecə-gecə zəhərliyib öldürdülər yazıqları. Birinin də bir aylıq balaları qaldı. İndi bilərlər, kimə hürürdü o itlər”, - deyə digər izləyicimiz qeyd edib.
Qeyd edək ki, bənzər insident Nəsimi parkı ərazisində də qeydə alınıb.
