Jurnalist Cəmil Məmmədlinin məhkəməsi təxirə salınıb. Sumqayıt24 bu haqda 7 mart tarixində Qaynarinfo.az-a istinadən xəbər verir.
Proses bu gün Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilməli idi. Onun təxirə salınma səbəbi isə Cəmil Məmmədlinin iclasa qatıla bilməməsi olub.
Bildirilir ki, konvoy çatışmazlığından jurnalistin məhkəməyə gətirilməsi baş tutmayıb. Hakim prosesin onlayn keçirilməsini təklif etsə də, qarşı tərəf razılaşmayıb.
Qeyd edək ki, Cəmil Məmmədlinin məhkəməsi yekunlaşmaq üzrədir. Ötən prosesdə dövlət ittihamçısı jurnalistin 8 il 3 ay müddətinə həbs edlməsini istəyib.
Məmmədli Cinayət Məcəlləsinin 178.2.4 (dələduzluq-xeyli miqdarda ziyan vurmaqla törədildikdə), 182.2.1 (hədə-qorxu ilə tələb etmə - qabaqcadan əlbir olan bir qrup şəxs tərəfindən törədildikdə) 182.2.2 (təkrar hədə-qorxu ilə tələb etmə) və 221.2.2-ci ( xuliqanlıq) maddələri ilə ittiham olunur.
Jurnalist ittihamları qəbul etmir və cinayət işinin qondarma olduğunu bildirir.
