Gənclər və Könüllülər Mərkəzinin ofisinin açılışı olub. Sumqayıt24 bu haqda 4 dekabr tarixində xəbər verir.
Ofis Azərbaycan Qızıl Aypara Cəmiyyətinin (QAC) Sumqayıt şəhər bölməsində yerləşir. Beynəlxalq Qızıl Xaç və Qızıl Aypara Cəmiyyətləri Federasiyasının (IFRC) maliyyə dəstəyi ilə yaradılan ofis 5 dekabr – Ümumdünya Könüllülər Gününə bölmənin könüllülərinə hədiyyədir.
Açılışda IFRC-nin proqram və əməliyyatlar üzrə meneceri Serdar Günel, milli cəmiyyətin inkişafı üzrə nümayəndə Aleksandr Mordovin, Türk Qızılayın Azərbaycandakı nümayəndəsi Hüseyin Çıtak, Qızıl Aypara Cəmiyyətinin icraçı katibləri Xalidə İsgəndərova, Elşən Səlimzadə və digərləri iştirak ediblər.
Qonaqlar ofisə baxış keçirib, bölmənin fəaliyyəti ilə tanış olublar. Onun könüllülük hərəkatının daha geniş vüsət alması və səmərəliliyinin gücləndirilməsinə töhfə verəcəyi bildirilib. Bölmənin fəal könüllülərinə təşəkkürnamələr, həmçinin IFRC və Türk Qızılayın hədiyyələri verilib.
