“Aztelekom” MMC-nin Sumqayıt Telekommunikasiya qovşağında çalışan əməkdaşlar qəfil işdən çıxarılıblar.
Həmin şəxslər bir neçə gün öncə Konkret.az-a müraciət ünvanlayaraq maaşlarının uzun illərdir artırılmamasından şikayət edirdilər. Müraciətdən və problemin işıqlandırılmasından sonra, onlar üçün vəziyyət daha da qəlizləşdi. Belə ki, əməkdaşlar anidən imtahan olunduqlarını və bu adla işdən çıxarıldıqlarını bildirirlər.
“20 dəqiqəlik görüşdə bizə sadəcə suallar verdilər. Halbuki bu, test şəklində imtahan deyildi. Yeni avadanlıqlarla bağlı biliklər tələb olundu, amma bizə həmin texnikalarla bağlı heç bir təlim keçirilməyib. Sonra da bildirildi ki, texniklərə ehtiyac yoxdur. Mən 29 ildir burada işləyirəm, Bakı Dövlət Rabitə və Nəqliyyat Kollecini bitirmişəm. Hazırda tək anayam və banklara borcluyam. Necə olur ki, illərlə işləyən əməkdaşlara indi “siz lazım deyilsiniz” deyilir?”, – şikayət edən vətəndaşlar qeyd ediblər. Eyni zamanda işdən çıxarılanlar arasında şəhid ailələrinin də olduğunu vurğulanıb.
Məsələ ilə bağlı “Aztelekom” MMC-dən bildirilib ki, 14 may 2025-ci il tarixində Sumqayıt Telekommunikasiya Qovşağı yenidən təşkil olunaraq “Aztelekom” MMC-yə qoşulub. Bununla bağlı qanunvericiliyin tələblərinə uyğun olaraq zəruri prosedurlar icra edilməkdədir:
“Yenidən təşkil çərçivəsində “Aztelekom” MMC-yə qoşulmuş müəssisənin işçiləri ilə ilkin fərdi görüşlərin ardından müvafiq vəzifələr üzrə diaqnostik qiymətləndirmələrin keçirilməsi planlaşdırılır. Sözügedən proses zamanı əməkdaşların hüquq və imtiyazlarının tam qorunması təmin olunur. Bundan əlavə qeyd edək ki, şəhid ailələrinin sosial müdafiəsinin gücləndirilməsi “Aztelekom” MMC-nin korporativ sosial məsuliyyət siyasətinin əsas istiqamətlərindən biridir və diqqət mərkəzində saxlanılır. Belə ki, qeyd olunan prosedurların icrası zamanı da qanunvericiliyin tələblərinə riayət edilməklə şəhid ailələrinin üzvlərinə xüsusi diqqət göstərilir”.
Ümid edirik ki, vətəndaşların iş və sosial təminat hüququnu nəzərə alan sözügedən qurum işdən çıxarılan əməkdaşları yenidən öz vəzifələrinə qaytaracaq və məsələ müsbət həllini tapacaq.
