Sumqayıtda lift təsərrüfatının yenidən qurulması ilə bağlı tədbirlər davam edir. Bu barədə 9 avqust tarixində sosial şəbəkələrə istinadən xəbər veririk.
Cari ilin ilk 3 ayında şəhərdə istismar müddətini başa vurmuş 63 lift müasirləri ilə əvəzlənib. Yaxın günlərdə isə 14 lift dəyişdiriləcək. Şəhərdə “Lift-Servis” Birliyi Dövlət Mənzil Fonduna aid hündürmərtəbəli binalarda 594 liftə texniki xidmət göstərir. Azərbaycanda ilk dəfə olaraq Sumqayıtda yaradılmış lift xidmətinin İntellektual İdarəetmə Mərkəzi fəaliyyət göstərir. Sözügedən sistem vasitəsilə liftlərin dayanma səbəbləri, idarəetmə stansiyasında olan ötürücülərin vəziyyəti, sakinlər tərəfindən liftlərin istismarı qaydalarının pozulması və s. haqqında məlumatlar quraşdırılmış xüsusi avadanlıqlar vasitəsilə onlayn rejimdə mərkəzləşdirilmiş İntellektual İdarəetmə Mərkəzinə ötürülür.
Son illərdə şəhər üzrə ümumilikdə 500-ə yaxın lift müasir, yeni elektron tipli liftlərlə əvəz olunub.
