Bakının mərkəzində, "Torqovıy" kimi tanınan Nizami küçəsində hər il olduğu kimi bu il də Novruz bayramı münasibətilə bayram yarmarkası təşkil olunur. Minlərlə insanın axın etdiyi yarmarka paytaxtda əsl bayram ab-havası yaradır.
Sumqayıt sakinləri isə oxşar tədbirin doğma şəhərlərində keçirilib-keçirilməyəcəyi ilə maraqlanırlar. Əhali sayına və inkişaf tempinə görə ölkənin ən böyük şəhərlərindən biri olan Sumqayıtda da belə bir yarmarkanın təşkil olunmasını istəyənlər az deyil. Sakinlər sual edir: Sumqayıtlılar yenə bayram ovqatı üçün Bakıya üz tutmalı olacaqlar?
Xatırladaq ki, Yeni il ərəfəsində Bakıda "Soyuq əllər, isti ürək" yarmarkası qurulduğu vaxt Sumqayıtın mərkəzində, Nizami meydanında ticarət köşkləri, daha dəqiq desək ərazini "tolkuçka"ya bənzədən çadırlar quraşdırılmışdı.
Məsələyə aydınlıq gətirmək üçün Sumqayit24.az Sumqayıt Şəhər İcra Hakimiyyətinə sorğu ünvanlayıb. Qurumun mətbuat katibi Eyvaz Qocayev bildirib ki, qarşıdakı günlərdə bununla bağlı qərar qəbul ediləcək.
Hazırda isə Sumqayıt sakinlərinə rəsmi qərarı gözləmək qalır..
