Sumqayıtda bina tikintisinin aparılacağı ilə bağlı yayılan xəbərlər 15-ci məhəllə sakinlərinin narahatlığına səbəb olub.
"Xəzər Xəbər" TV-nin məlumatına görə, sakinlər iddia edirlər ki, park ərazisində tikinti işləri aparılacaq və bu, yaşıllığın məhvinə gətirib çıxaracaq.
Şikayətçilər bildirirlər ki, mövcud parkda hansısa şirkət tərəfindən bina tikintisinin həyata keçirilməsi planlaşdırılır.
Vətəndaşlar qeyd edirlər ki, bir neçə gündür şirkət əməkdaşları parka gələrək bəzi yerləri qazıblar. Ərazidə hər hansı bir tikilinin aparılmayacağı deyilsə də, sakinlər buna inanmır.
"Key M Group" MMC-nin nümayəndələri bildiriblər ki, 15-ci məhəllə ərazisində 1950-ci illərdə inşa olunmuş, istismar müddətini başa vurmuş və hazırda qəzalı vəziyyətdə olan 12 ədəd yataqxana mövcuddur. Sözügedən yataqxanalar və binalar sökülərək, yerində müasir tipli çoxmərtəbəli binaların, şəhər sakinlərinin istirahəti üçün parkın və digər zəruri obyektlərin inşa edilməsi nəzərdə tutulur. Bu işlər Sumqayıt Şəhər İcra Hakimiyyətinin sərəncamına əsasən həyata keçiriləcək. Hazırda ərazidə geoloji kəşfiyyat işləri aparılır. Bütün sənədləşmə işləri tamamlandıqdan və sakinlərlə razılıq əldə olunduqdan sonra yenidənqurma işlərinə başlanılacağı qeyd olunub.
Sumqayıt Şəhər İcra Hakimiyyətindən isə bildirilib ki, hazırda ərazidə hər hansı bir tikinti işi aparılmır. Gələcəkdə yalnız istismar müddətini başa vurmuş yataqxanaların sökülməsi və onların yerində qanunvericiliyə uyğun şəkildə abadlaşdırma və tikinti işlərinin aparılması planlaşdırılır.
