Sumqayıt sakinləri uzun müddətdir şəhərdəki qeyri-qanuni təşkil olunan parkinqlərdən narazıdırlar.
Sumqayit24.az-a müraciət edən vətəndaşlar bildiriblər ki, “parkovşik”lər ticarət mərkəzlərinin, mağazaların qarşısında, küçələrdə və hətta yaşayış binalarının həyətlərində sürücülərdən heç bir qanuni əsas olmadan pul yığırlar. Ödəniş etməyənlərə qarşı isə təzyiq göstərir, aqressiv davranır və onları söyürlər.
Qanun isə aydındır. Dövlət avtomobil yollarında səlahiyyəti olmayan şəxslərin parklanma yerləri təşkil etməsi, xidmət göstərməsi və ödəniş tələb etməsi hallarında fiziki şəxslər 100–200 manat, vəzifəli şəxslər 300–500 manat cərimə olunmalı, hüquqi şəxslər isə 1500–2000 manatadək cərimə və ya 15 günədək inzibati həbsə məruz qalmalıdırlar.
Lakin Sumqayıtda vəziyyət hələ də dəyişməyib:
“Bakıda belə hallar dərhal aradan qaldırılır, Sumqayıtda isə gördüyünüz kimi...” – deyə şikayətçilər bildiriblər.
Şəhər sakinləri sual edir: “Qeyri-qanuni parkinqləri kim idarə edir? Onlara qarşı niyə tədbir görülmür? Qanunun icrasına niyə laqeyd yanaşılır?”
