"Sumqayıt Şəhər İcra Hakimiyyəti bu gün səhər saatlarında şəhərin 13-cü mikrorayonu ərazisində baş verən partlayışla bağlı müvafiq tədbirlər görür".
Bu məlumat Oxu.az-ın sorğusuna cavab olaraq Sumqayıt Şəhər İcra Hakimiyyətindən verilib. Bildirilib ki, partlayış nəticəsində zərərçəkmiş evlərdə yaşayan ailələr müvəqqəti olaraq yaxınlarının evlərində məskunlaşıblar:
"Hadisənin nəticələrinin aradan qaldırılması üçün Sumqayıt Şəhər İcra Hakimiyyəti və aidiyyəti qurumlar tərəfindən müvafiq tədbirlər görülür.
Hazırda mütəxəssislər tərəfindən zədələnmiş binanın texniki vəziyyəti ilə bağlı araşdırmalar aparılır. Veriləcək ekspert rəyləri əsasında binanın bərpası və ya digər zəruri tədbirlər barədə qərar qəbul ediləcək.
Sumqayıt Şəhər İcra Hakimiyyəti hadisə baş verən andan etibarən vəziyyəti nəzarətdə saxlayır. Zərərçəkmiş ailələrə lazımi dəstəyin göstərilməsi, sakinlərin təhlükəsizliyinin təmin olunması və yaşayış şəraitinin bərpa edilməsi üçün bütün resurslar səfərbər edilib".
Qeyd edək ki, hadisə nəticəsində altı nəfər xəsarət alıb. Ətrafdakı binalara və maşınlara ziyan dəyib.
