Sumqayıtda antisanitar vəziyyətlə bağlı şikayətlər səngimir.
Sumqayit24.az-a daxil olan məlumata görə, Xəzər bağlarının dəniz istiqamətində yerləşən hissəsi yenə məişət tullantıları ilə çirkləndirilib.
Sakinlərin iddiasına görə, buna səbəb bəzi şəxslərin zibilləri əraziyə atmasıdır. Ən yaxın zibil qutularının təxminən 300 metr məsafədə, dəniz sahilində yerləşdiyi və sakinlər üçün uzaq olduğu qeyd edilib.
Vətəndaş bildirib ki, Xəzər bağlarında məişət tullantıları həftədə iki dəfə evlərin hasarlarından toplanır və bu xidmətə görə aylıq 4 manat ödənilir. Onun sözlərinə görə, dəniz kənarına zibil atanlar bu ödənişi etmək istəməyən şəxslər ola bilər.
Xatırladaq ki, Sumqayit24.az bu məsələ ilə bağlı müxtəlif vaxtlarda şikayətlər işıqlandırıb.
"Siz problemi işıqlandırdıqdan sonra ərazi təmizlənir. Lakin problemin həlli bu deyil. Əraziyə xüsusi xəbərdlıq lövhələri, hətta kameralar quraşdırılmalıdır ki, zibil atan şəxslərə qarşı ciddi mübarizə aparılsın".
Bundan əlavə, 14-cü məhəllə, bazarın yanında isə zibillərin gec-gec daşındığı qeyd olunub. Bu cür vəziyyətin ərazidə xoşagəlməz görüntü yaratdığı qeyd olunub.
Bir sözlə, sakinlər ərazilərdə nəzarətin gücləndirilməsini, xəbərdaredici lövhələrin quraşdırılmasını, ərazini çirkləndirən şəxslərin cərimələnməsini və zibillərin vaxtında daşınmasını təklif edirlər.
