Sumqayıt Şəhər İcra Hakimiyyətinin başçısı Zakir Fərəcov və Sumqayıt Dövlət Universitetinin (SDU) rektoru, professor Nurəli Yusifbəyli universitetin 3-cü tədris korpusunda aparılan təmir və yenilənmə işləri ilə tanış olublar.
Sumqayit24.az xəbər verir ki, bu barədə universitetdən məlumat verilib.
Şəhər rəhbəri və universitetin rektoru korpusda görülən işləri nəzərdən keçirib, yenilənən auditoriya, inzibati və yardımçı otaqlara baxış keçirib, tədris mühitinin daha da yaxşılaşdırılması istiqamətində həyata keçirilən tədbirlər barədə məlumat alıblar.
Xatırladaq ki, SDU-nun 3-cü tədris korpusunda Humanitar və sosial-siyasi elmlər fakültəsi və Əlavə təhsil şöbəsi fəaliyyət göstərir. Korpusda tələbə və əməkdaşların istifadəsi üçün kitabxana və yeməkxana ilə yanaşı, idman infrastrukturu da mövcuddur. Binanın idman zalında Azərbaycan Qılıncoynatma Federasiyasının nəzdində yaradılmış Sumqayıt mərkəzi fəaliyyət göstərir.
3-cü tədris korpusunda tədris və inzibati məkanların yenilənməsi ilə yanaşı, binanın istilik təminatının yaxşılaşdırılması istiqamətində də işlər görülür. Belə ki, qazanxana və istilik sisteminin əsaslı təmiri həyata keçirilir. Müasir avadanlıq və idarəetmə sistemi ilə təchiz ediləcək yeni istilik sisteminin binanın daha etibarlı və davamlı istilik təminatına xidmət etməsi nəzərdə tutulur.
