Sumqayıtda bəzi piyadalar yol hərəkəti qaydalarına məhəl qoymur, "zebra" və işıqforun olmasına baxmayaraq özlərini yolun ortasına ataraq həm həyatlarını, həm də sürücüləri təhlükəyə atırlar.
Sülh prospektinin ən gediş-gəlişli hissələrindən birində bir neçə ay əvvəl piyadaların təhlükəsiz hərəkəti üçün işıqfor quraşdırılıb. Bir müddət yol polisi əməkdaşları həmin ərazidə dayanaraq piyadaları maarifləndirməyə, yolu düzgün keçmək qaydalarını izah etməyə çalışıblar.
Media olaraq biz də bu məsələni dəfələrlə işıqlandırmış, vətəndaşları diqqətli olmağa çağırmışıq.
Lakin görünən odur ki, bəzi piyadalar hələ də qaydalara əməl etmək istəmir. Onlar işıqforun avtomobillər üçün yaşıl işığında yolu keçir, üstəlik "zebra"dan istifadə etmədən, birbaşa yolun ortası ilə hərəkət edirlər.
Bu cür məsuliyyətsiz davranış isə həm piyadaların, həm də sürücülərin həyatını ciddi risk altına qoyur.
