Sumqayıtda ünvana suşi çatdıran restoran kuryeri döyülüb.
Oxu.az-ın məlumatına görə, şəhər sakini olan qadın restorandan yaşadığı ünvana suşi sifariş verib. Sifariş restoranın kuryeri tərəfindən ünvana göndərilib. Kuryer mənzil başına çatarkən, ünvanı dəqiqləşdirmək üçün sifarişçi xanıma zəng vurub. Telefon danışığı zamanı tərəflər arasında anlaşılmazlıq səbəbindən mübahisə yaranıb və kuryer müştəri ilə sərt danışıb. Bu vaxt qadın telefonu qardaşına verib. Kuryer isə telefonu söndürərək, həmin nömrəni blok edərək, sifarişi çatdırmaq üçün başqa kuryerə verib.
Sifariş ünvana çatdırıldıqdan sonra qadının qardaşı həmin restorana gedərək kuryeri tapıb. Aralarında yaranan mübahisə nəticəsində həmin şəxs kuryeri döyüb və dişi qırılıb.
Kuryer dərhal polisə məlumat verib və hadisə yerinə polis əməkdaşları gəliblər. Faktla bağlı cinayət işi başlanıb, iş məhkəməyə göndərilib.
Sumqayıt Şəhər Məhkəməsində keçirilən prosesdə təqsirləndirilən şəxslə zərərçəkmiş arasında barışıq elan olunub və cinayət işinə xitam verilib.
