Sumqayıtda restoran ərazisində qanunsuz saxlanılan quşlar aşkarlanıb.
Sumqayit24.az xəbər verir ki, IDEA İctimai Birliyinin təşəbbüsü, Daxili İşlər Nazirliyi və Ekologiya və Təbii Sərvətlər Nazirliyinin iştirakı ilə sentyabrın 2-də Nəsimi adına Mədəniyyət və İstirahət Parkında yerləşən “Turan” restoranında monitorinq keçirilib.
Yoxlama zamanı ərazidə qanunsuz saxlanılan dəvəquşları və 13 ədəd boyunbağı tutuquşu aşkarlanıb. Quşlar Bakı Zooloji Parkının baytarları tərəfindən götürülərək klinik müayinə və reabilitasiya işlərinə başlanılıb.
Qeyd edək ki, IDEA-nın vitse-prezident Leyla Əliyevanın rəhbərliyi ilə həyata keçirilən “Urban Ecology” layihəsi çərçivəsində bir neçə il əvvəl Bakıda tutuquşular təbiətə buraxılmışdı. Sumqayıtda aşkarlanan tutuquşular da yenidən azadlığa buraxılacaq.
Son illər ölkədə genişmiqyaslı yaşıllaşdırma işləri və IDEA-nın fəaliyyəti nəticəsində qanunsuz ağac kəsimlərinin sayı azalıb, yeni yaşıllıqlar salınıb, şəhərdə vəhşi təbiət nümayəndələrinin bərpası üçün əlverişli şərait yaranıb.
IDEA bir daha vətəndaşlara müraciət edərək, qanunsuz şəkildə vəhşi heyvan saxlanılmasına yol verməməyə çağırır və belə hallarla rastlaşdıqda “Təbiətə təcili yardım” 1113 qaynar xəttinə və ya təşkilatın sosial şəbəkələrinə məlumat verilməsini xahiş edir.
