Sumqayıtda Vətən müharibəsi şəhidi Elgün Abbaslının qızı Nəzrinin doğum günü qeyd edilib. Bu haqda bu gün, 17 dekabr tarixində Sumqayıt Heydər Əliyev mərkəzi məlumat yayıb.
Tədbirdə şagirdlər tərəfindən hazırlanmış kompozisiya nümayiş etdirilib. Mərkəzin direktoru və Səməd Vurğun adına Mərkəzi Kitabxananın Uşaq Şöbəsinin müdiri Nəzrini təbrik edib, daha sonra isə onlar hamı ilə birlikdə ad gününü qeyd ediblər.
Tədbir S.Vurğun adına Mərkəzi kitabxana və Sumqayıt şəhər Heydər Əliyev mərkəzi tərəfindən təşkil edilib.
Elgün Abbaslı Vətən müharibəsində Cəbrayılın, Füzulinin, Zəngilanın, Qubadlının və Laçının azad edilməsi uğrunda gedən döyüşlərdə vuruşub. Abbaslının içində olduğu maşın 10 noyabr 2020-ci ildə Şuşa istiqamətində ermənilər tərəfindən atəşə tutulub. O yaralanmağına baxmayaraq, geri çəkilməyib. Əksinə Elgün şəhid olmuş komandirinin nəşini ərazidən çıxararkən özü də şəhid olub. O, Sumqayıt Şəhidlər Xiyabanında dəfn olunub.
