Sumqayıtda ictimai sanitar qovşaqlarla bağlı vəziyyət vətəndaşlarda narazılıq yaradıb.
Sumqayit24.az-a daxil olan şikayətə görə, bəzi ərazilərdə ya ayaqyolu var fəaliyyət göstərmir, ya ümumiyyətlə yoxdur, ya da ki, yalnız biri fəaliyyət göstərir.
Vətəndaşlar bildiriblər ki, Dənizkənarı bulvarda cəmi 1 ayaqyolu var. Heydər Əliyev parkı, Göyərçin abidəsi yaxınlığında olan ərazilərdə isə sanitar qovşaq olsa da, fəaliyyət göstərmir. Lüdviqshafen parkında isə heç ayaqyolu yoxdur.
“Bu böyük şəhərdə barmaqla sayılası ictimai tualet var. Onlardan da demək olar ki, çoxu fəaliyyət göstərmir. Bəs yerli əhali və ya turistlər təbii ehtiyaclarını necə ödəsinlər?”,- deyə şikayətçilərdən biri bildirib.
Vətəndaşlar aidiyyəti qurumlardan ictimai sanitar qovşaqların sayının artırılımasını, həmçinin fəaliyyət göstərilməsini tələb edirlər.
