Sumqayıtda 10 startap öz məhsullarını yerli investorlara təqdim edib.
Sumqayit24.az xəbər verir ki, İnnovasiya və Rəqəmsal İnkişaf Agentliyinin dəstəyi, "SUP VC" şirkətinin təşkilatçılığı ilə regionlarda “Innostart” layihəsinin inkubasiya mərhələsinin “DemoDay” tədbirləri uğurla baş tutub. “DemoDay” tədbirində yerli dövlət və özəl təşkilatların nümayəndələri, innovasiya sahəsindən ekspertlər və müxtəlif startap təsisçiləri qatılıblar.
Qeyd olunub ki, “Innostart” inkubasiya proqramı çərçivəsində ümumilikdə 32 startap qurulub. Onlardan 10-u Sumqayıtda fəaliyyət göstərir.
Proqram müddətində iştirakçılar üçün iki fərqli inkubasiya mərhələsi təşkil olunub. Bu mərhələlərdə onlara biznes modellərinin inkişafı, məhsulun təkmilləşdirilməsi, bazar araşdırması və investorlarla əlaqələrin qurulması kimi sahələrdə dəstək göstərilib.
Regional "DemoDay" tədbirləri startapların təqdimatları üçün geniş imkanlar təqdim edib. Növbəti mərhələdə startaplar öz ideyalarını “Grand DemoDay” tədbirində təqdim edəcəklər. “Grand DemoDay” tədbiri çərçivəsində çıxışı ilə fərqlənən ən yaxşı 4 startap ümumilikdə 50 000 manat mükafat qazanacaq. Bu, innovativ ideyaların dəstəklənməsi və reallaşdırılması üçün mühüm stimuldur.
Bu inkubasiya proqramları regionlarda startap ekosisteminin inkişafına, gənc təşəbbüskarların dəstəklənməsinə və innovasiya yönümlü iqtisadiyyatın formalaşmasına mühüm töhfə verir. Layihənin uğurla keçirilməsi gələcəkdə belə təşəbbüslərin genişləndirilməsi və innovativ layihələrin artmasına zəmin yaradır.
