Sumqayıt şagirdləri "Yay fest" adlı tədbirə qatılacaqlar. Sumqayıt24 bu haqda Abşeron-Xızı Regional Təhsil İdarəsinə istinadən xəbər verir.
Xızı şəhər Heydər Əliyev parkında, 30 iyun tarixində təşkil olunacaq tədbir "Yay məktəbi"nin yekununa həsr olunur. Burada Sumqayıt şəhər, Abşeron və Xızı rayonlarının şagirdləri və təhsil işçiləri, həmçinin müxtəlif dövlət qurumlarının nümayəndələri iştirak edəcəklər.
Sumqayıt-Abşeron-Xızı məktəblilərinin birgə intellektual və əyləncə proqramı çərçivəsində rəqs, muğam nömrələri, rəsm, əl və toxuculuq işlərinin sərgisi, interaktiv dərslər və fəaliyyətlər, bacarıqlı əllər, bədii gimnastikanın təqdimatı, ekoloji-tərbiyəvi tədbirlər, idman yarışları, peşəyönümü ilə bağlı fəaliyyətlər, məntiqi, tənqidi və yaradıcı təfəkkürü inkişaf etdirən öyrədici oyunlar nümayiş etdiriləcək.
