Sumqayıt sakinləri yeni tikilən hündürmərtəbəli binadan narazıdır. Bu haqda bu gün, 24 may tarixində BakuTV-yə istinadən xəbər veririk.
21-ci məhəllə sakinlərinin sözlərinə görə, ərazidə çoxmərtəbəli binanın tikintisi zamanı təhlükəsizlik qaydalarına riayət edilmir. Vətəndaşları burada quraşdırılan yükqaldırıcı kran, güclü külək zamanı ətrafa səpələnən tikinti materialları narahat edir. Həmçinin tikintinin əhalinin sıx yaşadığı ərazidə aparılması da onların narazılığına səbəb olur.
İş icraçısı Vahid Hüseynov və Sumqayıt Şəhər İcra Hakimiyyətinin nümayəndəsi Kənan Babayev bildiriblər ki, ərazidə bütün qaydalara riayət edilir və tikinti üçün bütün lazımi icazələr verilib.
Təhlükəsizlik üzrə ekspert Elmar Nurəliyev bildirib ki, tikinti sahəsinin ərazisi hasara alınmalı, hasar qoruyucu sipərlə örtülməlidir, kənar şəxslərin girişinə məhdudiyyət qoyulmalıdır.
