Sumqayıt şəhəri, H. Z. Tağıyev qəsəbəsində ağacların qanunsuz kəsilməsi faktları aşkar olunub.
Bu barədə Report.az-a 4 saylı Regional Ekologiya və Təbii Sərvətlər İdarəsinin rəisi Asif Məcidov məlumat verib.
Aparılan araşdırma zamanı Səttar Bəhlulzadə küçəsində qeyri-yaşayış obyektinin tikintisi aparılan ərazidə, tikinti ətrafına çəkilmiş hasarın daxilində 3 ağacın zədələndiyi, eyni zamanda ekoloji ekspertiza rəyinin tələblərinə əməl olunmadığı müəyyən edilib:
"Faktla bağlı tikintiyə cavabdeh şəxs Zamiq Şıxəliyev barəsində İnzibati Xətalar Məcəlləsinin 253.5.1 və 541-ci maddələrinə əsasən inzibati protokol tərtib edilib və o, fiziki şəxs qismində 900 manat məbləğində cərimə olunub".
"Eyni zamanda, hasarın kənarında 15 ağacın kəsildiyi və nəticədə təbiətə 7 min 200 manat məbləğində ziyan dəydiyi müəyyən olunub. Faktla bağlı akt tərtib edilib. Təbiətə dəymiş ziyanın məbləği cinayət tərkibi yaratdığından, məsələyə hüquqi qiymət verilməsi üçün toplanmış materiallar prokurorluğa göndərilib. Tikinti ətrafında olan ağaclar sayılaraq qeydiyyata alınıb və onların mühafizəsinin təmin olunması məqsədilə iş icraçısına təhvil verilib”, – A. Məcidov əlavə edib.
