1 İyun - Uşaqların Beynəlxalq Müdafiəsi Günü Sumqayıtda yüzlərlə valideyn üçün həm bayram idi, həm də sınaq. Əl-ələ tutub sahilə və parka üz tutan valideynlər övladlarına xoş bir gün yaşatmaq istəyirdilər, amma…
Uşaqların gözlərində sevinc, valideynlərin isə üzündə həm sevinc, həm də narahatlıq vardı. Təəssüf ki, bu narahatlığın səbəbi çox keçmədən özünü göstərdi: qiymətlər.
İki gün əvvəl qiyməti 1 manat olan karusellər "dəyərlənərək" 2 manat təşkil edib. Elektrik maşınlar, pambıq şirniyyatı, dondurma, sərin içkilər – hamısının qiyməti 50-100 faiz artırılıb. Bəziləri üçün bu sadəcə “bazarlıq qaydası”dır. Amma bəs bu günün adı nə idi? Uşaqlar Günü.
Bir ata uşağını cəmi bir karuselə mindirib, dondurma alaraq geri döndü. Gözlədiyimiz səhnə bu idimi? Bayram günü – sadəcə müəyyən sahibkarların əlavə qazanc günü olmamalıdır. Əgər bu günlərdə sevinc “qiymət etiketinə” çevrilirsə, biz uşaqların gələcəyini necə formalaşdıracağıq?
Ədalətli olmalı idik. Bu cür günlərdə bəlkə də qiymətlər endirilməli, uşaqlara daha çox imkan yaradılmalı idi. Amma əksinə oldu. Valideynlərin çoxu dar büdcəsinə görə məcbur qalıb övladlarını vaxtından tez evə apardı. Sevinci yarımçıq, uşaqların arzuları isə növbəti ilə saxlanıldı.
Biz hansı dəyərləri təbliğ edirik? Uşaqlar bizim gələcəyimizdir deyirik, amma onların bir gün sevincini belə “satış fürsəti” kimi görürüksə, sabaha hansı ümidlə gedirik?
Sumqayıtın parklarında, karusellərin yanında eşidilən gülüşlər bir neçə dəqiqəlik idi. Sonra yerini valideynlərin susqunluğuna, uşaqların başını aşağı salmasına verdi.
Uşaqların Beynəlxalq Müdafiəsi Günü — təkcə təqvimdə bir tarix deyil. Bu, cəmiyyətin uşaq sevgisinin və qayğısının güzgüsüdür.
