Sumqayıt şəhəri, 10-cu mikrorayon sakinləri köhnə xeyir-şər evinin illərdir baxımsız vəziyyətdə qalmasından narazıdırlar.
Sumqayit24.az-a müraciət edən vətəndaşların sözlərinə görə, sözügedən tikili 1990-cı illərin əvvəllərində 55, 60 və 70-ci binaların önündə inşa olunub. Təxminən 11-12 il əvvəl isə Sumqayıta güclü qar yağdığı vaxt xeyir-şər evinin dam örtüyü uçub. Həmin vaxtdan etibarən tikili yararsız vəziyyətdə qalıb və bu günədək bərpa olunmayıb.
Ərazi uzun müddətdir baxımsız qaldığı üçün həm antisanitar vəziyyət yaranıb, həm də tikili təhlükəli hala düşüb.
Sakinlər məsələ ilə bağlı bir neçə dəfə aidiyyəti qurumlara, o cümlədən İcra Hakimiyyətinə müraciət etdiklərini, lakin indiyədək hər hansı tədbir görülmədiyni deyirlər:
"Bu tikilinin sökülməsi daha məqsədəuyğun olardı. Həmin ərazidə uşaqlar üçün oyun meydançasının salınması həm faydalı olar, həm də həyətin görünüşünü yaxşılaşdırar".
