Sumqayıtlı gənclər “Technest” təqaüd proqramından faydalana bilər. Bu haqda Rəqəmsal İnkişaf və Nəqliyyat Nazirliyinin yaydığı məlumata istinadən yazırıq.
Sözügedən proqram nazirliyinin təşəbbüsü ilə start götürüb. Əsas məqsədlərdən biri - informasiya texnologiyaları üzrə kadrlar yetişdirmək və ölkədə rəqəmsal inkişafa töhfə verməkdir.
Sumqayıtla yanaşı proqramdan paytaxt sakinləri də yararlana bilər. Hazırda 120 məktəbli, 618 tələbə və məzun bulud həlləri, bulud inzibatçılığı, böyük verilənlər bazası, kibertəhlükəsizlik, avtomatika, elektronika, müxtəlif proqramlaşdırma dilləri, “UI/UX” dizayn kimi müxtəlif istiqamətlər üzrə təhsil alırlar.
“Technest” proqramının özəlliyi ondan ibarətdir ki, yuxarı sinif şagirdləri məktəbdə təhsil almaqla yanaşı rəqəmsallaşan dünyanın tələb etdiyi yeni peşə sahələri üzrə də özlərini inkişaf etdirə bilirlər.
“İKT üzrə bir sıra kurslarda təhsil alan 50 tələbəmiz artıq müxtəlif müəssisələrdə işlə təmin olunub. Qısa müddətdə bu, olduqca yüksək nəticədir”, – deyə nazir Rəşad Nəbiyev vurğulayıb.
