Sumqayıt Tibb Mərkəzi şəkərli diabet xəstələrinin dərman təminatını daha səmərəli və rahat etmək məqsədilə yeni qaydaların tətbiqinə başlayıb.
Sumqayit24.az xəbər verir ki, şəkərli diabet xəstələri hər 3 aydan bir (səhhətində hər hansı bir problem yaşandıqda, doza korreksiyasına ehtiyac olduqda isə daha qısa zaman fasiləsində) yaşadıqları ərazi üzrə poliklinikada həkim-endokrinoloqa müraciət edib müayinədən keçərək, qəbul etdikləri dərmanlar və dozalar barədə ambulator kartdan çıxarış əldə etməlidirlər.
Çıxarış vətəndaşın dislokasiya üzrə qeydiyyatda olduğu Ailə Sağlamlıq Mərkəzindəki ailə həkimi-terapevtə təqdim edilməlidir.
Ailə həkimi-terapevt çıxarış əsasında imtiyazlı resept tərtib edəcək və dərmanların alınma forması barədə məlumat verəcək.
Sonrakı mərhələdə dərmanlar sahə tibb bacıları tərəfindən birbaşa ünvanınıza çatdırılacaq.
Bu sistem poliklinikalarda yaranan növbə və sıxlığı azaldaraq dərman təminatını daha səmərəli və rahat edəcək.
Vətəndaş müraciətləri və əlavə suallar üçün 055 872 47 34 qaynar xəttinə zəng edə bilərsiniz.
Xatırladaq ki, redaksiyamız tərəfindən şəkər xəstələrinin dərman almaq üçün saatlarla növbədə dayanmalı olduqları barədə xəbər verilmişdi.
