Sumqayıtda qəzalı vəziyyətdə olan yataqxananın sakinləri mövcud şəraitdən narazıdırlar.
Sumqayit24.az-a müraciət edən 42-ci məhəllədə yerləşən 16 saylı yataqxananın sakinlərinin sözlərinə görə, bina uzun müddətdir ciddi problemlərlə üzləşib və hazırda qəzalı vəziyyətdədir.
Onlar bildirirlər ki, yataqxananın kanalizasiya sistemi tez-tez daşır, nəticədə binada və ətraf ərazidə antisanitar vəziyyət yaranır. Bildirilib ki, ümumi istifadədə olan sanitar qovşaqların əksəriyyəti də yararsız vəziyyətdədir ki, bu da gündəlik yaşayışa ciddi çətinlik yaradır.
Vətəndaşlar qeyd edirlər ki, binanın bəzi hissələrində çökmələr baş verib, mərtəbələrarası konstruksiyalarda isə çatlar və dağılmalar müşahidə olunur. Sakinlər binanın texniki vəziyyətinin gündən-günə pisləşdiyini və hər an qəza baş verə biləcəyindən narahat olduqlarını bildirirlər.
Onların sözlərinə görə, problemlə bağlı dəfələrlə aidiyyəti qurumlara müraciət edilsə də, indiyədək məsələnin həlli istiqamətində ciddi tədbirlər görülməyib.
Məsələ ilə bağlı aidiyyəti qurumlara sorğu ünvanlanıb.
