İsveçdə yaşayan, ədəbiyyatımıza ədəbi-miniatür janrını gətirən Eluca Atalı ilə "İnsan dəyişməsə, dünya dəyişməz" adlı görüş keçirilib. Sumqayıt24 bu barədə Xidmət Sahələri üzrə Sumqayıt Dövlət Peşə Təhsil Mərkəzinə istinadən xəbər verir.
Heydər Əliyev Mərkəzində baş tutan tədbirdə Sumqayıt şəhər təşkilatlarının, PTM-in, ev sahibi olan mərkəzin, orta təhsil müəssisələrinin rəhbər və nümayəndə heyəti, Sumqayıt Dövlət Universitetinin bir qrup müəllim və tələbəsi, mərkəzin mühəndis-pedaqoji heyəti, valideyn və tələbələri, həmçinin digər oxucular iştirak ediblər.
Əməkdar jurnalist Əntiqə Qonaq öz çıxışında Eluca Atalının əsərləri, onunla əməkdaşlığı haqqında söz açıb. Mərkəzin "İT texniki dəstək üzrə texnik" ixtisasının tələbələri tərəfindən yazıçının həyat və yaradıcılığı ilə bağlı hazırlanan qısametrajlı film nümayiş olunub.
Dərzilik üzrə oxuyan tələbələrin "Xarıbülbül" əl işi ona hədiyyə kimi verilib. "Aşpaz" ixtisasında təhsil alan gənclər isə üzərində "Ənqa quşu" kitabı təsvir edilmiş tort hazırlayıblar.
Sonda Eluca Atalı sualları cavablandırıb, "Tiqranizm Xocalıda", "Ənqa quşu", "Nalşəkilli mühasirə" adlı kitablarını imzalayaraq oxuculara təqdim edib.
