2 nömrəli Şəhər Xəstəxanasında uzun müddətdən sonra çəpgözlük əməliyyatlarının icrasına başlanılıb.
Sumqayit24.az xəbər verir ki, tibb ocağında daxili çəpgözlükdən əziyyət çəkən 13 yaşlı pasiyent üzərində uğurlu əməliyyat keçirilib. Əməliyyatdan sonra pasiyentin problemi tamamilə aradan qaldırılıb.
Əməliyyat oftalmoloq-cərrah, tibb üzrə fəlsəfə doktoru Leyla Qəhrəmanova tərəfindən anestezioloq-reanimatoloq Qara Qarayevin iştirakı ilə icra olunub.
Görmədə ikiliyin qarşısı alınan və itiliyi artan pasiyent artıq ambulator müalicə üçün evə buraxılıb.
Qeyd edək ki, Sumqayıt Tibb Mərkəzinin 2 nömrəli Xəstəxanasında Oftalmologiya şöbəsi fəaliyyət göstərir. Hazırda 11 həkimin çalışdığı şöbədə gözün müayinəsi və cərrahi əməliyyatlar icbari tibbi sığorta ilə qarşılanır. Həmçinin burada gün ərzində təxminən 60-dan çox vətəndaşa ambulator tibbi xidmət göstərilir.
