Bildiyiniz kimi, Milli Məclisin ənənəvi yay tətili başlayıb. Qanunvericiliyə əsasən, parlament hər il iyulun 15-dən avqustun 30-dək fəaliyyətini dayandırır və deputatlar məzuniyyətə yollanırlar.
Sumqayit24.az Milli Məclisdə Sumqayıtı təmsil edən deputatların bu il yay məzuniyyətini harada keçirəcəklərini öyrənməyə çalışıb.
Deputat Elnarə Akimova bildirib ki, məzuniyyətinin böyük hissəsini doğma Sumqayıtda keçirəcək:
"Məzuniyyətimi əsasən yaşadığım Sumqayıt şəhərində keçirəcəm. Üzərində işləməli olduğum iki kitabım var. Bu mənada, məzuniyyət hər zaman mənə tədqiqatlarıma köklənməyim üçün yaxşı fürsət olur. Ümumiyyətlə, mənim üçün evin verdiyi hüzuru heç nə əvəz etmir. Yalnız avqust ayında on günlük Qusarda dincəlməyi düşünürəm. Orada ata əmanəti yeganə bibim yaşayır. Hər məzuniyyət vaxtı həm onu ziyarət edir, həm də dincəlirəm".
Deputat Hicran Hüseynovanın köməkçisi isə bildirib ki, deputat yay məzuniyyətini Bakıda ailəsi və nəvələri ilə birlikdə keçirəcək.
Tahir Mirkişilinin köməkçisi deputatın məzuniyyət planları barədə məlumatlı olmadığını deyib.
Bununla yanaşı, Sumqayıtı təmsil edən digər deputatlar – Mehriban Vəliyeva, Səbinə Salmanova və Zaur Şükürov redaksiyamızın sorğusunu cavablandırmayıblar.
Beləliklə, Sumqayıt deputatlarından yalnız ikisinin məzuniyyət planları açıqlanıb, bir deputat barədə məlumat əldə etmək mümkün olmayıb, üç deputat isə mediaya ünvanlanan sorğunu cavabsız qoyub. Bu isə millət vəkillərinin mediaya açıq olub-olmamaları məsələsini bir daha gündəmə gətirir.
