Sumqayıtda ictimai istifadə üçün nəzərdə tutulan ərazilərin tədricən ticarət obyektlərinə çevrilməsi artıq adi hala çevrilib. Şəhərin müxtəlif nöqtələrində boş qalan hər qarış sahənin kommersiya məqsədilə istifadə edilməsi halları günü-gündən artır. Bu tendensiya isə sakinlərin rahatlığını arxa plana keçirir.
Belə hallardan biri Koroğlu prospekti, 12-ci mikrorayon ərazisində yerləşən avtobus dayanacağında müşahidə olunur. Sərnişinlərin avtobus gözləməsi üçün nəzərdə tutulan dayanacaq faktiki olaraq kiçik ticarət nöqtəsinə çevrilib. Dayanacaqda günəbaxan tumlarının satış vitrini, saqqız aparatı və enerji içkiləri üçün soyuducu yerləşdirilib.
Nəticədə dayanacağın içərisində, xüsusilə sol tərəfində sərnişinlərin dayanması üçün nəzərdə tutulan sahə xeyli daralıb. Yağışlı və küləkli havalarda dayanacaqda avobus gözləyən sərnişinlərin qorunması üçün yer qalmır və insanlar istər-istəməz çöldə gözləməli olurlar.
Müşahidələr göstərir ki, şəhərdə bu cür hallar təkcə bir dayanacaqla məhdudlaşmır. İctimai istifadəyə ayrılmış sahələrin tədricən ticarət obyektlərinə çevrilməsi şəhər mühitində həm estetik, həm də funksional problemlər yaradır.
Avtobus dayanacaqları ilk növbədə sərnişinlərin rahatlığı üçün nəzərdə tutulduğu üçün bu məkanlarda ticarət avadanlıqlarının yerləşdirilməsi məhdudlaşdırılmalıdır. Əks halda, şəhərdə dayanacaqların əsas funksiyası arxa plana keçəcək və onlar sadəcə satış məntəqəsinin əlavəsinə çevriləcək.
